البديل برس الأخباري

الاخبار العاجلة

الطيب عبدالماجد يكتب "يوميات علوب "ميلاد ( يارا ) ….

Auth admin
05 Jan, 2025
246

شركة شحن

تعالوا نعزمكم العيد ميلاد دا اطلعو حبة

مره كدا زمان لما كنا بنشوف الحرب في الأفلام وبنشوف ( الحب ) بيناتنا …

عندي صاحبي كدا إسمو ( طارق ) …ماعندو اي حاجه لكن بعرف أي زول …عندو مهارات خاصة كدا في الاختراق

أها طارق دا قال لى رأيك شنو يا ( علوب ) أنا معزوم عيد ميلاد بت زميلتنا فى الجامعة ...

ماتمشى معاى ...!!؟

قلت ليهو كيف يعني ناس أنا ذاتى مابعرفم امشى معاك كيف ....!!!؟؟

قلت لي أفرض قالو ده منو ..!!!؟

والله اخد ليهو ضحكه كده لما ( شفقني ) .....!!

قال لى والله انت متفائل شديد

ياخ ديل هم ذاتم مابعرفو بعض .....!! خلي إنت

دى بت ياعلوب بتقرا معانا في الجامعة الله يعلم نحن كنّا قايلنها بت الكترونية ....!!!

أول حاجه اسمها ( يارا ) تتوقع شنو غير المطرة

الحاجه التانية عيونا ديل خدر مع كحلى على بنى كده....!!!

ده أولًا بالتبادى ....!

الحاجه التالتة ياهو داااك الدم بتشوفو ماشى فى عروقا ....جوووووو .....!!!

دي لو مشت الدكتور ولا محتاجه ( أشعة ) …

بعملو ليها معاينة بس …!!

و( لونا ) ده لى هسه مافى زول قادر يحددوا …!!!

ناس بتقول أصفر…وديك قالو زرعي جماعة قالو عسلى ....البعض

قال خاتف لونيين …واحدين قالو شفنا الشافا ...!! ولى هسه ماوصلنا لى نتيجه .......!!!

جاى تقول لى يقولو إنت منو ..!!؟

ياخ ديل (الهارديسك ) بتاعم ذاتو مابقراك ...!!

أنا سايقك بس تتفرج ..!!

ياخ أقول ليك كلام...!!

أنا ذاتى ماشى اتفرج ...!! اها النكلمك

هو آنا ذاتو عزمونى بالصدفة ...!!

مشترك لى فى جمعيه كده فى الجامعة إسمها

( جمعية حماية الحيوان ) ...!!

يشهد الله انا ذاتى ماعارف بقصدو شنو ...!!

بس دخلت ساكت كده لقيت ليك البنات الكيوت ديل

مسجلات هناك وسجلتا .....!!

قال لي معانا واحد في الحلة إسمو ( عيبة )

( شوف ليك إسم )

قال عندو ( كارو ) فيهو حصان …قال لي من ستة صباحا لي ستة مسا ( الكارو ) دا شال أي حاجه تخطر على بالك

قال مره داير ( يجرا ) بيهو عربية ..قال الحصان لما ضحك

وقال لي ( عيبة ) دا …..الكلام دا ( عيب ) منك

المهم ( يارا ) دى معانا فى الجمعيه وعزمتنا كلنا .....!!

بيتم زي مية طابق كده والعربية ذاتا البتجيبا الجامعة لى هسه انا ماعارف ماركتا شنو..!!

ولاحظ انها بتتغير من وقت للتانى ...!!

يشهد الله اللبسه اللابسا السواق أنا كنت قايلو ده أبوها ....!!!

اها ماشى ولا عايز (تترمتل ) قبلك هنا ...!!!

أنا الوقت داك سارح مع الكلام البقول لى فيهو ده ...بس بلعتا ريقى ده وقلت ليهو يازول أنا جاااهز قلت نمشى هسه دى نمشى ...!!!

قال لي أها يا ( علوب ) عليك الله أحسن لبسه عندك ..!! ماتشرط عينا مع الناس ديل ...!!

الساعة خمسة سته كدا نتحرك …الناس ديل بيتهم فى (المنشية ) يعنى على بال مانصل العيد ميلاد ذاتو يكون خلص ......أو ممكن يقفلو الباب

يازووول انا من الساعة تلاته فى الحمام ..!!

قلت لى ( مشاعر ) القميص والبنطلون ديل تكويهم كما لم تكويهم من قبل...!!

والجزمة دى براى قعدت فيها غسيل بره وجوه ...!! واستحميت مرتين ...!! وبقيت جاهز... !!

أها زي الساعة تلاته كدا طارق جاني

( غايتو حرب البسوس ما استعدو ليها كدا )

شادى ليهو عربيه كده ماعرفتها عربيه ولا ( فضية ) حاجه كده هجين بين الرقشه والعربيه ..!!

المهم انحشرنا ليك فيها ودورنا ...!!

طارق قال لى أمانه الليله ياعلوب ماحتشوف شعاع ...!!!

يازول وصلنا ليك بعد ساعتين كده ...!!

العربيه تدخن وتتهوزز ونحن ( نتخجا ) بي جوا

وماقادره تمشى ...!!

خاتين لينا ( ريحة ) تركيب كدا قلنا نستعملها قريب الباب

كان اتريحنا هنا الزلط دا ما بتوصلنا …!!

غايتو المهم وصلنا حدود المنطقة زي الساعة تمنية

وربع كدا وحسب الوصف لقينا ( بقالة الفوزان )

( شوف الاسم ذاتو )

نحن (طعمية الزين ) ...تلاقيك ( وش )

ومرات فيها حصحاص ( نتقاضى عنه احياناً)

إكرامًا لعمك ( الزين )

بتاع البقالة طوالى قال لينا هداك البيت المولع الظاهر داااك

( وهل يخفى الحجر )

والشكولاتة دي مرصوصة رص في الفوزان عارف ببيع وين ولي منو

عمك ( يس ) مرصرص لينا ( الصلصة ) زي الحواجز

ومرات في العيد كدا بخت ( مربة ) سعيد …

و ( ببا ) ياعلب المربة

الظاهر الجماعة هنا معروفين ...!!!

المهم وصلنا للقصر الأميرى ده ....!!

بيت قدر حقنا عشره مرات ...!!

ولقينا ليك العربات الواقفة بره دي أقل واحده.. لاندكروزر .....!!

وقفنا عربيتنا بعييد ورا الحيطة فى شارع مضلم كدا ومشينا على البيت ...!!!

زووول بسرقا مافي ماعندها مفتاح …سلكين كدا بنحكهم مع بعض يقربو يجيبو ( نفط )

أها من بعيد ناس الهدف ديل واقفين بره أنا قايلا مستشفى ...!!!

عاينو لينا كدااا زي بتاعين الجمارك ...!!

شكو فينا حالة تسلل لكن في النهاية دخلونا

أول حاجه المسافة من خشم الباب لى جوه البيت أطول من الزلط لحدى بيتنا ...

والشجر بس ضاربينو اورنيش ..!! يسو كدى ....!! شكلو ذاتو فرحان ...!!

والحاجه الزي النخلة ديك ( الملسا ) تشبة النخلة لكن متمرة واقفة النبق

قالو بتنمو في الأجواء الاستوائية …

ياربي جابو ليها ( الاستوائية ) هنا

وأنوار كده ماعرفنا مركبنها وين ...!!

المهم يازول وصلنا بالسلامه ...!!

فى بنات كده سلمو على طارق ...!!

( غزلان بس بتنطط )

وجات ( يارا ) من هناك دافرا ….( الأسد النتر )

الشهادة والعمل الطيب

دى شنو دى ..!!

...

البت دى ماأظنها شافت الشمس دي قريب

أقل حاجه سنتين ...!! ..!!

وموسيقى هاديه كده شغاله ...!!

( برضو ما عرفنا طالعة من وين )…!!

وجماعه لابسين أبيض فى أبيض …!!

( ديل دكاترا ولا شنو )

زي بتاعين المسلسل لافين فينا يقسمو فى الشربات ....!!

وجنس تهذيب …

قال لي ( اورانج جيوز ولا تفاح )

قربت أقول ليهو ما عندكم تفاح ( فلت )

الصينيه فيها أربعة ألوان ....!! داير اشيل لى كبايه طارق غمز لى .. يعنى ماتشيل ...!!!

يشيلك العطش انت ياخ ...!! مالك علينا ..!!

المهم جليتا ..نعمل شنو ...!!

قلت أمكن خايف تحمينا العشا ...!!

لحدى ماقال لى فى أضانى ..انت هسه شفت ليك كبايه ناقصة ...!! يعنى كلهم ماشالو ...!!

دايرم يقولو الشرفانين ديل منو ..!!

المهم بلعتها و سكتا ...!!!

وقدمنى لى ( يارا ) دى ...قال ليها ده ( علوب ) صديقنا ...!!

والله البت دى بدون خجله قالت ليهو عزوز...!!!!؟؟؟ قال ليها ..لا .لا علوب ..علوب ...!!

قالت لى اهلًا ياعزوز ...!!

تاااانى ..!!

ماعرفتا المعنى شنو...!!؟

ياربى ماقادره تقول علوب ..!! ولا خايفه الاسم ده ينط فيها ...ولا عايزه تدلعنى ..!!!

ماعرفت والله ...!!!؟؟

المهم يازول أنا كأنو بحضر لى فى فيلم ...!!

البنات ديل لابسات زي المجلات ...!! وجو أولاد كده مجبصين بى بناطلين وفنايل والشعور دى تتلامع ....!! واتاريهم كلهم اولاد وبنات بتعارفو شديد ..يازول سلام كده وونسه.....!!! وهاي ..هاي

ونحن قاعدين فى الطربيزه زي حرس الجامعة ...!

بس بعد شويه كده اسمع ليك صوت كده ماعرفتو جاي من وين أتكلم بالانجليزى ...!!

وفى النهايه كده قال كنقراتيوليشن ياااااارا ...!!

بصوت عالي كدا

والصفقه دى دورت...!!

طوالى نحن صفقنا...!!!

وأنا ماعارف نحن ذاتو صفقنا ليي...!

بس يوم النتايج

ولقينا ليك الناس دى بدت تتحرك لى مكان تانى غير ده ....!!

طواااالى قطرناهم ..!!

مشو بينا لى حته تانيه فيها ( كيكه )

نحن الوحيدين في الحفلة البنقول ( كيكة )

الناس دي كلها مدورة ( التورتة )

والتورتة واقفه طول العمود وملبسنها ذي العروس ...!! وفى راسا شمعة ...!!!

وفجأة كده صوت فنان بغنى بالانجليزى برضو دور فى السماعات ...!!

( انتو الناس ديل نصارى ولا شنو )

وهابى بيرث دى تو يو ...!!! شقت عنان السماء

مدورو واحد لابس ليهو سماعات قدامو ( كبانية )

أنا قايلو طيار ..!! حاسي بي شخصية كدا

وكلهم يغنو معاه..!! فجاة كده قلب مصرى ...!! وسنه حييييلوة ياجمييييل ...

وارقص ياجميل فى الساحه ...!!

وبرضو يغنو ...!!

وتمايلت الحسان

واناا وصاحبي دا نكشف....!!!

بس فجاة الحته ضلمت …

انا قلت (أمممك ) الكهربا قطعت ...!!

أتاري هم القطعوها عشان يطفوا الشمعة ...!!

و( يارا ) قالت كدى ونفخت ...!!

قولك اووووف دي

التقول نفختني في وشي دا حسيت بي حمى كدا

ورجفة في الأوصال

( شمعة لاقت شمعة)

وكم دمعة سالت في خدود الشمعة

وتانى ولعو الأنوار وتصفيق وصفافير ...!!

وتهانى ومقالده ومطايبه ....!!

وكل واحده تجى مادا بوزا تاخد ليك سيلفى معاها ...!!

ونحن قاعدين فى طربيزتنا بوزنا ده بس مفتوووح أها ...!! نعاين فى جنس الحلمه دى ...!!

أها يازول كل واحد يدى ليك ( يارا ) دى حاجه كده فى يدها ويمشى ...شى كيس احمر..صغير كدا

( دا بكون دهب)

وشئ كرتونة مغلفه..!! وشى دبدوب ...!!

اتارى دى الهدايا

والله نخن من الخجله دايرين نتلب فى حوض السباحه ده لأنو جينا مطلقين يدينا ...!!!

أها أتاري دي المناظر بس ...!!

قالو ال DJ. حيبدا...!!

انا قلت بسسس انا لى زمن داير اشوف ال DJ ده ذاتو هو منو وشكلو كيف ...!!؟

طلع ياهو الراجل ابو سماعات بتاع الكبانيه ده ...!!!

وقال كده دور... What's up ...ققققققك ..!!

انا داير انط من الكرسى ...!!

ويازول الجماعة ديل كلهم قاموا اولاد وبنات ...!! والله بغنوا مع الزول ده حرف بى حرف ...!!!

ياحليلنا نحن الانجليزى كلو عديناهو

( برزنت كونتينيوس تينس ...) ...!!

وبدا ليك الرقيص العجيب ...!!

لا لا دى ياها السينما ذاتا ...!! والتورته واقفه زي الأسد زوووول هبشا مافى ...!!

أتذكرت عيد ميلاد ( المغيرة ) صاحب ( الكجم )

قبل فترة وديت ود جيرانا الصغير قال معزوم .!!

اخواتو بنات …التورته اتلعبت قبل إطفاء الشموع

قلت للمغيرة تميت كم سنة …!!؟؟

قال لي أسأل أمي

( ماشاء الله عليك ذكاء اصطناعي )

( الكجم ) جاب أربعة بسكويت بركة هدية

وأكل ستة

المهم تانى رجعنا للأجواء دى ..!!

طوالى ( يارا ) مسكت المايك ...وشكرت الناس على الحضور وقالت هى أسعد زول فى الدنيا بى حضورنا

( ياربى أنا معدود مع الحضور ده ...!!؟

( ماظنيت....!! )

وقالت سعادتا بتكتمل انها حتعرفنا بأعز حبايب عندها (بوسى ) ..( وبونى ) انا قلت قطع شك ديل أخوها وأختا الصغار ….

وبينى وبين نفسى قلت شنو الدلع والمسخرة الأكثر من اللازم دى يبوظو الشفع بالاسامى دى !!!!

أها طلعت بوسى دى (كديستا ) وبونى ده (كلبا ...)

بوسي فضل ليها تقول لينا نشيد ....!!!

غايتو الاتنين مهذبين اكتر من ( صبري ) صاحبنا وبي كتير

واغرب حاجه أهل ( يارا ) اصلو ماشفناهم...!!

أتاري جو وقت الضلمه ديك باركو العيد واختفوا فى واحد من الطوابق دى وخلونا ...!!!

( خلق مساحات للأصحاب )

اتذكرتا أبو المغيرة يوم عيد الميلاد...!!!

يكورك لحدى الأولاد ديل ماطلعوا من البيت ...!!

حميتونا النوم ...!! ماخلاص...!! الزفت ده انتهى ..!!

الزفت ده عيد ميلاد ولدو ..)

أها يازول جات الساعة حداشر كده ...قالوا حيكون فى بوفيه مفتوح ( وأوفر نايت ) …!!

قلت لى ( طارق ) نحن حدنا المفتوح ده ونبقى مارقين ...!!

والعربيه أم دخاخين دى فيها توصلنا وفيها تقطع وننقطع بالليل ده ...!!

فعلا ضربنا العشا ده وأول يوم أشوف الجداد ده مهيون ومكرفس مالاقى البفكو ..!!

واللحمه مدفقه عايزا البياكلا ...والرز مشتت ....!!

حسّيت بى غصه فى حلقى إنو فى ناس الليلة نايمه بدون عشا ...!!

الله يزيد ويبارك ليهم …..

ناس ( بسبوسة ) وناس شاي سادة

ناس الدنيا عندها عادة

وناس الدنيا عمل وعبادة

والله بيقسم للأرزاق

حاول ترضى برزقك دايماً

والارزاق ماها قروش ولاها عروش

ما دولار ولا كافيار

الكاش بركات ما شيكات

مره كتير ما بعمل حاجه

ومره قليل وفي الأصل زيادة

أصلو الخالق رازق وعادل

ما بظلم زول

ارزاق مقسومة …

بيها بترضي ….بتحول بنكك العملة سعادة

تعمل ( فيتو ) لا تلم في المال لا تلقى سعادة

قوم ياطارق ارحكاكا ....

سارا خلص عيد ميلادا ...

قوم ياطارق والله معاكا ...

نشوف البلد وين أعيادا ...!!؟

بالمناسبة عيد ميلاد مغيرة كان ( أطعم) من حق يارا

رغم الضغوط الدولية التي مارسها السيد الوالد

الشفع ديل اتشرطوا بالضحك واجواء مبهجة

و إن شاءالله دايماً

و ( العمر كلو يا يارا ) ...!!

ياربى تميتى كم سنة ...!!

شركة جريس لاند لخدمات الشحن المختلفة

هل لديك تعليق؟

لن نقوم بمشاركة عنوان بريدك الالكتروني، من اجل التعليق يجب عليك ملئ الحقول التي امامها *

بحث

الاصناف

معرض الصور

الاشارات

مواقع التواصل

الاخبار المشابهة

رحلة إلى أرض الموت والدمار ( حلقة *أولى

Auth admin
17 Apr, 2025

رشان اوشي تكتب دقلو ...يشعل حطب الخرائط لطبخ وليمة دارفور

Auth admin
15 Apr, 2025

رشان اوشي تكتب الحقيقة والتهويل

Auth admin
06 Apr, 2025

الاخبار العاجلة