البديل برس الأخباري

الاخبار العاجلة

الطيب عبد الماجد يكتب :يوميات علوب " العزيزه الما بتسأل ...!!"

Dr Abas
11 Jul, 2025
132

شركة شحن

أنا طالع من البيت لمحتا السعديه جارتنا دي كأنها مهمومه كده ...السعديه دي أم كمال الود الجاب 92.6 %في الشهاده وعملنا ليهو ديك ياالحفله فرتقتا أمونه بنيران صديقة

اها ناس السعديه ديل ناس كده في حالم ..!!رحل زوجها وترك لها (كوم ) عيال ..!! تحزمت (السعيدة ) وكبرتم وعلمتم ...!! كمال ده الفي النص عندو أختو اكبر منو شغاله مدرسه إسمها أمل ..!! واتنين اصغر منو في المدرسه بت وولد ..!!

ناس كده مستورين حال مابتسمع ليهم حس في الحله ومسالمين شديد ..!!البيت الساكنين فيهو ده الحاجه الوحيدة الطلعو بيها من الدنيا بيت بسيط كده لكن ضاميهم وساترم ونضيف شديد ..!!

( نظافة سرائرهم ...) ..!!

لو مشتهي تشرب ليك مويه من زير مندي مغطي بي شاش ومن فوقو غتاية خشب رويان وكوز (المونيوم) متمر وبلمع ..!!بس أقع الناس ديل ..!!ستروي ظمأك وتشرب كما لم تشرب من قبل ...!!

وطواااالي البيت ده مفرش ومنظم رغم قلة أثاثه ....!! صورة ابوهم معلقا في (البرندا )وقد انكسر بروازها لكن نظارته السميكة لاتزال جلية وكأنه يراقب المكان ..!! والاهم من ده كلو إنّو الأولاد ديل شطار شديد ومهذبين جنس تهذيب وبحترمو الكبير والصغير ...!!

المهم جيت سلمتا عليها ..قلتا ليها كيف يا خالتي السعديه ....!! قالت لي الحمد لله ...!!

(وهولاء يقترن الحمد باجاباتهم ... إقتران الشمس بشعاعها) ..!!

قبل ماتتمها ..!!حسّيت العبره سادا حلقا ...!! عايزه تمشي ..!!جرت توبا ده علي وشها وبكت ...!! اي والله بكت ....!! بكت شديد ومن جوووه ...!!

وما أغلي دموع الحرائر العفيفات ...!!!

انا ذاتي لما اتبرجلتا كدا ..!! قلتا ليها خير يالسعديه مالك ...!!؟ في شنو ..!!؟

قالت لي مافي حاجه ..!! وتقشقش في دميعاتا ..!! قلتا ليها كيف مافي حاجه أنا مازي ولدك ...!! في شنو ...!!؟ قالت لي وبصوت متقطع ...!! الحمل تقل علي شديد ياعلوب ....!! ( أمل ) بتي قالو ليها في المدرسة الشغالة فيها انهم عايزين يقللو العدد ..!! وهي اتخرجت من كلية الفنون ذي ما انت عارف وبتدرس البنات الرسم ..!! أول واحده شالوها ...!! هديك راقده حالتا ذي الواطا ..!! قالت مانحنا البنقرا فنون ..!!

وانتا عارفا حساسه قدر شنو ...!! أبوها الله يرحمو دايما كان بقول لي ( أمل ) دي حتطلع فنانه عظيمه يالسعدية ....!! ويشيل ويجيب ليها في حاجات الرسم ..!!

(وهاهو اللون الأسود فقط ماتبقي من علبة الألوان )

تذكرت لوحاتها التي تزين جدران منزلهم الوريف

قالت لي وانتا عارف ياعلوب أنا ياهو بقيت مازي أول وحركتي قلت ...!! قدر الحاجات البشتريها وأبيعا بقت غاليه شديد ..!! فوق قدرتي ..!! وماجايبا حقها .....!!

بتصدق ياعلوب كمال التعبتا فيهو ..قال عايز يشتغل ..!!؟

قلتا لي ماعافيه مِنْك كان قلتا كدا تاني ..!!

الماببكيني شنو ياعلوب ..!!! وعادت للدموع ...!! اووووووووووه

أخدت لي نفس عميييق

ووقفت مشدوها لاحول لي ولا قوة ...!!

(وانا نفسي علي باب الكريم أقف ...!! وما أوسعه من باب ...!! )

قلتا ليها مايهمك ... الله في ....!! أنا بتصرف ...!! (وذهني خال من أي صرفه ...) غير إيماني المطلق أن هذه الدنيا يديرها ملك ...!!

ودعتها ودموعها تلاحقني ....!! وكان أنبل مامنحته لي في هذا الصباح ان أقول الحمد لله علي كل حال ...!!

( سعديه الحزينة تمنحني ثباتا ويقين ) ....!!

الله يسعدك يالسعديه ويفرجها عليك ...وين ماقبلتي ..!!وكلي ثقه ...!!

لا ادري لماذا قفز الي ذهني صديقي خليل ...!! ابو الخل بتعرفوهو (خليل )...!! القال لي (سحر ) خطيبتي دي اهتماماتا سطحية وأنها بتستخف بي نبض الجماهير...!!

إمكن لأنو اكتر زول ممكن يشاركني إحساس الحزن الانا فيهو ده ...!!

اتصلتا عليهو قلتا ليهو إنتا وين ..!!؟؟ قال لي انا في مدني ...!! عندي حبوبتي كده عيانه مشيت اشوفا ...!!! قلتا ليه سلامتا ..!! فيك الخير ..!!

قال لي ما أهدتني إياه من قصص وحكايا وهي في شدتها .. يلزمني أن أصلها أينما كانت وهي لاتقوي علي الحراك ....!!

و أنا لم استغرب الزيارة ... !! فقط (لأنه خليل) ...!!!

قلتا ما احكي ليهو وازيد البيهو ....!! قلتا ليه خلاص تصل بالسلامه لحدي ماتجي ....!! قال لي مالك ياعلوب..!! صوتك ماعاجبني ..!!؟؟؟

حكيت ليه القصه وقلتا ليهو تعبتا ... قلت أحكي ليك تشاركني..!! بس ماراجنك تحلها ...( ياالوالي ) ..!!

ضحك ضحكة فيها غصة .....قال لي ياعلوب ...

(البلد أول ماتابا ( الفنون ) معناها عيانه ...!! ) أعجبني التشخيص ) ..!!

أخد ليهو نفس كده..!! وقال لي كدي لما أجي ...!!حسّيت بي راحه شويه وذهبت الي حال سبيلي ...!! وصورة السعديه لم تفارقني في ذلك المساء (المغبون) ....!!

أها بعد يومين كدا اتصل بى خليل قال لي (أمل ) وين ..!!؟ قلتا ليهو (أمل) منو .!!؟

قال لي جنيت ياعلوب ..!! أمل البت الحكيت لي عنها قبل يومين ...!!قلتا ليهو مالا ...!!؟ قال لي خليها تمشي المركز الثقافي الفرنسي أنا حصلتا ليها وظيفة هناك ..!! (أستاذه فنون ..!! ) وهم قالو أصلا محتاجين ...!!

انعقد لساني لحظتها ...!! قلتا ليه شكرًا ..!! شكرًا ياخليل ..!!خليتو علي الخط ..!! وجريت ناس السعديه ...!! دقيت الباب فتح لي كمال ..!! دخلتا لقيت السعديه بتقطع في بصل في الحوش بكل وقارها .!! قلتا ليها وين أمل ..!! أمل وينا..!! ؟؟؟؟ قالت لي ياها ديك جوه ..!! خير ياعلوب ..!! قلتا ليها نادوها لي ..!!

بدت امامي متماسكة وفي عيونها أسي ..!!

قلتا ليها مبروك يا أمل ناس المركز الفرنسي ديل دايرنك بالاسم تشتغلي معاهم ...!!!

وليتكم كُنتُم معي تشاهدو السعديه وقد انقلبت طاولتها علي الأرض ...وقامت لتحضن بنتها في مشهد لايستطيع القلم نقله ...لتبكي أمل هذه المره ...!! وتدخل مسرعه الي الداخل تنظر الي صورة والدها المعلقه علي الحائط ..!!

( أصدقكم القول ..!! كأني رأيت الصورة تبتسم ) ...!! السعديه قالت لي ان شاءالله ياعلوب الله يفرحك ذي مافرحتني ....!! ويديك لمن يرضيك..!! وتتعلا ماتدلا ...!! ودموع فرح تملأ عينيها الوسيمتين

قلتا ليها كدي النتعلا اول الدلدله ساهله ...!!وضحكت السعديه اخيراً ....!!

نظرت أنا للسماء وتأملت (الملك )عندما يسوق الرزق من باريس (عاصمة الفنون ) الي الخرطوم عاصمة( اليقين ) ...(وقد بدت ضنينة) ...ولا عاصم الا الله ....!!

سلام ياخليل..!! صديقي الجميل ....والله يسعدك يالسعديه ...

أوا لم تسميها ..... ( أمل ) ...!!!؟

يوميات علوب كل يوم

شركة جريس لاند لخدمات الشحن المختلفة