Create your Account
شركة جريس لاند لخدمات الشحن
شركة جريس لاند لخدمات الشحن
حال محاسنك مين الفسرا ….
- Auth admin
- 26 Feb, 2025
- 72
شركة شحن
( يوميات علوب )
( عبد الملك ) دا كان جارنا في الحلة …
زول ( اوفر ) كدا
وبنفعل مع أي حاجة … يعني مثلا تقول ليهو الليله عرس ناس ( محجوب ) بقول ليك لا حولاااا عرس عديل كدا ؟!
أو تقول ليهو مثلا ماشين مصر …!!
بقول ليك مصر مره واحدة ؟!
مصر …..( جنيف ) …!!؟؟؟
آي ( مصر ) ياعبد الملك في شنو ..!؟؟
اها كدا بس ياها دي الحالة
عندو نقص في ( هرمون ) رد الفعل ……!!
أها يوم كدا جا سايق ليك ولدو في يدو وستة شفع قاطرنو وهو في النص ( فلم هندي بس )
ماشين الروضة …قال ولدو دقاهو ولد تاني في الروضة …ماشي يدقو ليهو …!!
( بالله دا كلام دا )
أها لما لما وصلو ( الروضه ) بدل يمشي للمشرفة يستفسر ويستجلي الحقايق .
بقي براهو عامل حملة إستجوابات لامي الشفع ديل قال عايز يصل للجاني
الشفع ذاتم إتخلعو …
مسك ليهو شافع كدا ماعارف ذاتو هو قاعد وين
قال لي هسا توريني الدقا (بدر ) دا منو ….!! ؟؟
بي نهرة كدا
( بدر ) دا ولدو ( المدقوق ) …!!
الشافع شايل ليهو سندوتش طحنيه رماهو في الواطا
دي وشفط ليهو شفطتين هوا …..
ودخل في نوبة بكاء مر
معاها زي ابو الشهيق داك
إنفقع بالبكا
( دا تاني المطافي ما تسكتو )
بالله عبد الملك دا ما ببالغ ؟؟!!
( قاهر الأطفال ….)
ولا هاميهو مواصل في الإستجوابات
في النهاية في واحد كدا من الشفع ديل
أطلعوا على الحقيقة ….!!
( بالله هي الروضه ذاتا فيها غواصات ) ..!!؟
الجاني طلعت ( بت ) …!
إسمها ( منينة ) …..قالو بترصع الشفع ديل عااادي …..ومتصدرة الموقف وعاملة شغل …!!
ولسان حال الشفع بقول
مجنونة ماف زول دايرا
أها ( عبد ألملك ) وكت لقاها ( بت ) قبل ليك على
ولدو ( قبقبو ) ليك ……. كيييف تدقك بت ….!!
( يحلنا الله الليلة )
المهم الخبر وصل المشرفة جات جارية جري لقتو ليك
طايح في الشفع ديل …
يازول طوالي فتحت فيهو نار
قالت لي إنت ما بتخجل ياراجل إنت ….!!؟؟
معقوله لكن …!! دا أسلوب دا …!!
إنت بتهد في كل البنبنهو بالمناسبة …
انت لازم تتقدم للقانون ….!!
وقالت ليهو انت طبعا ال criminal behaviors بتاعتك عاليةوال miscalculation عندك متضخم ..!
( أبو الزفت )
وهو يتلفت زي الطيرة
ديل طبعاً المشرفات الجداد ( بضم الجيم ) ديل
قارنها قراية ما ساكت
في الشهادة مكتوب علم النفس ورياض الأطفال
نجضتو ليك عربي وإنجليزي!!
والخصلة بالجنبة
زمان حاجه ( رحمة ) دي الله يديها العافية فتحت ليها روضة في حلتنا دي ….
الشفع بخشو الساعة تمنية بطلعو الساعة اتنين كأنهم جايين من ( خيبر ) ….
…..مره شافع إنجرح وأظنو نزف زول جاب خبرو مافي
إتضح إنو حاجه ( رحمة ) دي قالو عندها نومة الضهرية ما بتلعب فيها …!!
اها هسا المشرفة دي تعبانة ساكت مع الزول دا هو كان بفهم نوع الكلام دا كان ساكي الشفع بالطريقة دي …
( عبد الملك ) دا لو عمل عمليتو دي في ( لندن ) كان هسا محاكمتو ناقلاها ال BBC وسبعة قنوات تاني …..!! وصورتو غلاف في الSun
قال للمشرفة أنا ما بتكلم مع الحريم شوفي لي راجل جيبي لي ……!!
حتى ( بدر ) الصغير دا نصحو قال ليهو خلاص يا أبوي
قال لي انت بالذات ما تتكلم إنت عار علينا …!!
( دمر الشافع ) ….!!
بس في اللحظة دي جات خاشه( لواحظ )
وليتها لم تأت …
( الشهادة والعمل الطيب )
طبعاً ( لواحظ ) دي تعتبر. من ( أعمدة ) الحلة ( شكلاً ) وموضوعاً ….زرافة لافة …
سماحة السنين …الحلة كلها عارفا القصة دي …
سماحة تلخم …!!
زوجها متوفي خلي ليها بت وولدين
بتها ياها ( منينة ) الدقت ( بدر ) دي …..!!
رجال الحلة وكت يقولو ليك ( لواحظ ) مرا مكافحة ….!!
تحلف تقول بتكسر في الزلط …..!!
حاجه ( الروضة ) تبيع في اللقيمات عمرا دا كلو
زووول قال عنها مكافحة مافي …!!
ديل شرطة مكافحة ( اللهب ) متضامنين مع ( اللهبة ) دي
طبعاً ( عبد الملك) وكت شافا زي الدقتو كهربا …!!
( جاك الببكمك يا تارك الصلاة )
أها في عز الهيجة دي بين عبد الملك والمشرفة
( لواحظ ) بهدوء كدا وصوت رصين ….ومتموج ….
قالت ممكن أفهم الحاصل شنو ؟؟
بس كدا ما زادتو
والله يا اخوانا كمنجة بس …!! الصوت ذاتو كيف كيف والطريقة …والأداء
الأداء رفيع شديد
( غايتو الزول لما يكون واثق في روحو دي …أمانة ما بتجدع…..)
عبد الملك ( إتماص ) ……
ولا حرف
وقعد يجلبغ ….
لا ..أصلو البت….!!
و ( بدر ) ولدي ………..
و ماعارف ( منينة ) زي بتي …
المهم كلام مقطع كدا …
كبكبة جد ….!!
( الجمال دا ما عندو رهبتو كمان )
( لواحظ ) دي من راجلا مات اتقدم ليها ( فيلق ) ….
واحدين ( معرسين ) وواحدين ( مطلقين )
واحدين عايزين يخشو التجربة الزوجية لأول مرة من شباك ( لواحظ )
وواحدين ( أرامل ) وواحدين ( أيتام ) يازول كل التشكيلات
في واحد سوري جابتو الحرب برضو جاها
ثروة قوميه لواحظ دي
وهي قافلة الباب دا قالت عايزه تتفرغ لي تربية أولادا ….!!
المشكلة في ( عبد الملك )
المشرفة ذاتا إندهشت في البركان الخمد دا …..!!!
يازول ( بدر ) ذاتو إندهش ….
المهم ( عبدو ) ذهب أبعد من ذلك ..
قال الحاجات دي بتحصل عادي خاصة وإنهم أطفال
( هياااااا الأطفال )
تقول والله
الأطفال الكنت ( معتقلم ) قبل شوية ديل ولا واحدين تانين ….!!
المهم ( لواحظ ) شكرتو على حسن تفهمو …
داير يقع على قدومو
والمشرفة مصدومة لهذا التغيير السلوكي الذي فاق سرعة الضوء ….!!
قالت مفروض نفتح روضة للناس الكبار برضو …!!
ولا قال ليها بتقولي في شنو ؟! مركز مع ( برج الاتصالات ) دا
أها قالو الخبر وصل لي ( إنعام ) …
( إنعام ؛ دي ( مرت ) ( عبد الملك ) دا وأم ( بدر )
إنتظرتو ليك على الحدود
جا من هناك يتقدل طابق ولدو …!!
قالت لي أها إن شاءالله أخدت بي تار ولدك ….ولا
( الأمم المتحده ) إتدخلت ؟؟
من ( الأمم المتحده ) دي عرفا قاصدة ( لواحظ )
لو قالت الحكومة كان رماها في المشرفة !!
قال ليها ابداً إعتذرو لي الجماعة وبعد تعب قبلت
الإعتذار ..
نط ( بدر ) قال لي أمو
الله يكتلني أم ( منينة ) دقت أبوي ذاتو ….!!
قالت ليهو بالحيل بتدقو أبوك الخفيف اللفيف
( أها كدا كويس يا كنغ )
….!!
المهم ( عبد الملك ) لازال تحت تأثير ( لواحظ ) ….
فوقع في المحظور
قال لي مرتو أفهميني يا ( لواحظ ) …
وليته لم ينطق …فكوهو بالشنطة قدام ( بدر )
بدر من الفرحة قلب هوبة …!!
يازووول الجو إتوتر شديد و ( عبد الملك ) محل يمشي
ما عارف …الرد جاهو أسرع مما إتخيل ….!!
ارض جو
المهم بعد وساطات وتفاهمات وضربات استباقية
تمت تسوية ….!!
يعني من ضمن الضربات الإستباقية
مرتو دي قالت ليهو …
هي ( لواحظ ) يا يمة داروها البهزو ويرزو قافلة الباب تفتحو ليك إنت البتشتكي من حق الطماطم ؟.!!
( رجمتو المجرمة )
( غايتو النسوان ديل ما تهظر معاهن اكتر من اللازم …لو طقوك بنشفوك ….!! ) ….!!
وتمت تسوية القضية ……!!
المهم ( لواحظ )ضربت لي ( إنعام ) قالت ليها جاياك في البيت …يعني المعنى تعتذر لأنو ( منينة ) دقت ( بدر ) …..
( إنعام ) ما بتقدر تقول ليها ما تجي …لكن كيف
مع البيت الفيهو مراهقين كبار دا …..!!
قالت ليها بتجي متين عشان أنا ماشه ناس أمي وبجي
قالت ليها بجيكم بعد المغربية كدا …!!
( إنعام ) عايزة المواعيد عشان تخارج ( عبد الملك )
قبل ماتنزل (القطرية ) دي ….!!
المهم عملت ليهو تكليف رسمي قالت ليهو عايزاك تمشي تجيب لينا حاجات رمضان ..وزودتو بي لستة للمطلوبات ….
زولك طبعا لسا تحت العقوبات ….شال لستتو وشتت
ستة ونص كدا ( لواحظ ) جات نازلة …
سايقة ( منينة ) من يدها لابسين التوب الأبيض ومرجعين الشعر دا لي ورا …!
الحلة كلها رجعت ورا
( إنعام ) ذاتا قالت ما شاءالله …
( لواحظ ) دي مره جات قاطعة ميدان الحلة …
في أعمامك كبار كدا بتفرجو في التمرين ….واحد فيهم بي طول حسو قعد يكورك ..( المحلي داخل عطبرة )
رد عليهو حاج التوم من الجهة المقابلة قال لي ضربو يااااا حكم
الميدان كلو مات بالضحك…..!!
ياخ ( إمام ) جامعنا ضحك …..!!
كان ماشي على صلاة العصر ….ختا الشال في خشمو كدا وضحك ….!!
شيخنا لطيف كدا
يازول أقول ليك كلام ….هي ذاتا ضحكت …أها
شوف حلتنا دي حنينة كيف ….!!
(حال السودان قبل ما تدقو المطرة)
ياخ إمامنا ذاتو ( مكنة ) …
عشان كدا الجمعة الجامع ( فل ) …..
الخطبة كلها الجنة وإستبرق …
ياخ القران دا كل ( إطناشر ) آية عن الرحمة بتقابلا آية واااحدة عن العذاب اي والله النسبة كدا شوف الرحمة دي كيف ….دين رحمة مادين عذاب
ايوااا أنا نسيت أقول ليكم …( بدر ) قبل ما أبوهو يمشي يجيب الحاجات قال ليهو أنا يا أبوي سمعت أمي قالت ناس ( منينة )؟جاييننا في البيت ….( زولك تاني اتكهرب )
المهم مشي بي سرعة لقط الحاجات القالوها ليهو
دي وخلى الباقيات أظنو وجا جاري كان يشوف اللمبة دي تاني
فعلا هو داخل وهم مارقين لاقاهم في الباب
سلم عليها ….داير يقع من طولو …
أها حبا يخفف دمو قال ليها والله الليلة سعيدين شفناكم مرتين ….!!
إنعام لما بلعت ريقا …!! وادتو ليك صرة كدا عادي ممكن تجيب شرار
وقاطعته بخشونة قائلة)
جبت الحاجات !!؟؟
قال ليها جبناهم …..
شالت منو الكيس برقة شديدة قربت تملخ يدو
…
طبعا النسوان ديل مرات بستعملو ( الماسح الضوئي ) يعني الواحدة بتمسح الكيس دا كلو بي نظرة وااااحدة بس ما بتزيدا ….بتعرف أي حاجة جواهو
أها ( إنعام ) كشفت كدااا ….
قالت ليهو وين …القرفة والهبهان ……!!؟
إتخيلو ( عبد الملك ) قال ليها شنو ……!؟؟؟
قال ليها …البركة في ( لواحظ ) دي مصنع الهبهان ونكهة القرفة …..خليها تدينا حبة …..
الزول دا ( إتحلج ) رسمي …
( لواحظ ) طبقت بتها وفكتا جرية
….
(
( إنعام ) أصلو ولا زادتو ……
شالت منو الكيس وقالت ليهو والله يا عبد الملك ..
ومن حلف بالله صادق ….. الليلة تجي تنوم في البيت دا واحد فينا بصبح مافي …..!!
كلام قصير كدا
( يمين ( بوتن ) ما هدد ( أوكرانيا ) كدا …..
وأخذ ( عبد الملك ) التهديد مأخذ الجد …….
حايم بالحلة يضرب في التلفونات للسماح له بالهبوط
الناعم …
( إنعام ) أظنها راجعت نفسها كدا قالت هي تعبانة مالا؟!
( عبد الملك ) شنو كمان البتديهو إحساس قدر دا انو مهم ؟!
…..
قالت ليهو تعال ياعبد الملك أنا متأسفة ….عملت ليك قومة وقعده ساكت ما بتستاهل
والله إتذكرت ( لواحظ ) قالت لي عنك شنو … لاعرفت اضحك ولا عرفت أبكي
قال ليها ..قالت شنو …!؟؟
قالت ليهو لما تجي البيت بوريك ….
جا جاري جري ومتلهف ( لواحظ ) قالت شنو …
قالت ليهو قالت لي معليش يا إنعام يعني …إنت
( عبد الملك ) دا مالو بقي كملان من لحم الدنيا كدا
…..عيان ولا شنو ….!!؟
قالت لي حتى ( منينة ) بتي قالت ليها بقى يشبه
( ماوكلي ) فتى الأدغال ….!
والله لو شفتو ( عبد الملك ) دا أنا قلت مات …
وشو بقي أصفاااار
وعيونو دخلن جوووه …
من المغسة قال ليها قولي لي ( لواحظ ) دي إنت كنت زمان …. زمن الشباب ….هسا قطرك فات وغنايك مات …!؟
( كضاابة يا رابحة والله وقعت على قدومك دا )
يمين ( لواحظ ) دي عندها شامة مفروض يدرسوها في البايولوجي
وهي بيني وبينكم ذاتا ولا علقت
لكن دي إنعام استخدمت النووي …..!!
أها عبد الملك بقى لما يلاقي ( لواحظ ) طوالي ….بحدر ليها
و ( إنعام ) كل فترة كده بتجدد ليهو التاشيرة
بتقول ليه الليلة مالا عيونك دي واقعة كدا ياعبدو ؟!
( انت خليتي فيها عبدو )
( بتخلي يرقص برا )
مش قلت ليك ما تلعب معاهن يا سيدا وملكا …!!
كلمتك زماااان قلت ليك البتابع ( النوارس ) بتجيهو الكوارث ….!!
خليك مع ( نعومة ) الحنينة دي مالك ومال الشامة
والشامة في خديدا زي نور القمر …
اللذيذه ( بدر ) ذاتو بعد مرات بقى بقول ليه
( ماوكلي )
لكن بالجد يا اخوانا وبعيد عن الحصل دا كلو وبكل أمانة…..
( لواحظ ..ناصية ) …!!
ويازمن …….
وقف شوية …!!!
شركة جريس لاند لخدمات الشحن المختلفة
هل لديك تعليق؟
لن نقوم بمشاركة عنوان بريدك الالكتروني، من اجل التعليق يجب عليك ملئ الحقول التي امامها *
بحث
الاصناف
معرض الصور
الاشارات
مواقع التواصل
الاخبار المشابهة
.jpg){kind=tracking}
هل تتحدث مع نفسك ؟
- Dr Abas
- 19 Feb, 2025
.jpg){kind=tracking}
صالون الطيب صالح
- Dr Abas
- 14 Feb, 2025
.jpg){kind=tracking}
الطيب عبد الماجد بيها نصبر شوية …
- Dr Abas
- 13 Feb, 2025
البديل برس .. مؤسسة اخبارية مستقلة وشاملة .. شعارنا .. الدقة والشفافية والموضوعية في تناول القضايا السياسية والاقتصادية والاجتماعية والالتزام بمبادئ الصحافة الحرة.. هدفنا .. تقديم خدمة إخبارية مميزة ومختلفة.. من خلال متابعتنا للاحداث اول باول على مدار ٢٤ ساعة.. البديل برس .. منبر كل السودانيين الاراء المنشورة في الموقع لا تعبر بالضرورة عن رأي الموقع وانما عن رأي كاتبها
المقالات الاكثر شهرة
-
تعرف علي انواع فصائل دم الحيوانات
- 19 Mar, 2023
-
النيل يبتلع 14 شابا
- 30 Nov, -0001
-
